Film - Naqli Nawab
Singer - Mohammed Rafi
Music - Babul
Lyrics - Kaifi Azmi

Tum Poochhte Ho Ishq Bala Hai Ke Nahin Hai
Kya Jaane Tumhen Khauf-E-Khuda Hai Ke Nahin Hai

Jeene Ka Hunar Sabko Sikhaata Hai Yahi Ishq
Insaan Ko Insaan Banata Hai Yahi Ishq
Bande Ko Khuda Karke Dikhata Hai Yahi Ishq
Is Ishq Ki Tauhin Khata Hai Ke Nahin Hai
Tum Poochhte Ho...

Maana Hai Badi Dard Bhari Ishq Ki Roodaad
Hoti Nahin Mitkar Bhi Mohabbat Kabhi Barbaad
Har Daur Mein Majnu Hue, Har Daur Mein Farhaad
Har Saaz Mein Aaj Unki Sada Hai Ke Nahin Hai
Tum Poochhte Ho...

Gham Phoolne-Phalne Ka Bhulakar Kabhi Dekho
Sar Ishq Ke Qadmon Pe Jhukakar Kabhi Dekho
Gharbaar Mohabbat Mein Lutakar Kabhi Dekho
Khone Mein Bhi Paane Ka Mazaa Hai Ke Nahin Hai
Tum Poochhte Ho...

Jab Ho Hi Gaya Pyaar To Sansaar Ka Dar Kya
Hai Kaun Bhala Kaun Bura, Iski Khabar Kya
Dil Mein Na Utar Jaye To Ulfat Ki Nazar Kya
Hum Dil Ke Pujari Hain Pata Hai Ke Nahin Hai
Tum Poochhte Ho...

BACK TO MAIN PAGE